La blogosfera astur entama a normalizase dafechu: Balones na rede

El sábadu pasáu nacía’l primer blog en llingua asturiana dedicáu dafechu al mundu del fútbol embaxu’l nome de Balones na rede, que diz querer ser un sitiu d’información y reflexón sobre tolos aspectos del deporte rei. Nun había na blogosfera asturiana blogs empobinaos al mundiu del fútbol lo que nun paez d’estrañar, porque pasa cásique lo mesmo en toles llingües del Estáu, incluyíu’l castellán, onde la presencia del deporte ye bien ruina. Pero que nun hubiera dengún paecía enforma raro. Yá nun hai vacíu.

“Vamos tratar esi mundu tan grande y complexu dende un puntu de vista reflexivu y d’analís, tratando temes que nun tienen por qué ser d’actualidá. Como nun podía ser d’otra manera, vamos falar de fútbol asturianu, pero tamién vamos afondar enforma n’otres lligues y países”. Esti ye l’enfotu d’aniciu del blogue, al que nun poemos sinon desea-y muncha suerte. Y que siga faciendo analís de la Champions munchu tiempu y davezu d’equipos como’l francés París Saint-Germain col qu’entamaba esti bloguie, embaxo’l títulu de “PSG: La historia interminable”.
La dirección del blogue ye http://balonesnarede.blogspot.com.